Guovlohálddahusdoaimmahat nuppástuhtii Giemajoga ja Iijoki čáhcefápmorusttegiid guolledoallogeatnegasvuođaid

Nuppástusa geatnegasvuođaide ozai guolledoallovirgeoapmahažžan doaibmi Lappi EJB-guovddáža Davvi-Suoma guolledoallobálvalusat, man mielde dilit leat mihtilmasat nuppástuvvan Iijokis, Giemajogas ja Raudanjokis eaige fápmorusttegiidda mearriduvvon guolledoallogeatnegasvuođat šat vástit fápmorusttegiid guollenáliide ja guollebivdui dagahan hehttehusaid. Guolledoallogeatnegasvuođat mat gustojedje, vuođđuduvve Davvi-Suoma čáhcerievtti ja alimus hálddahusrievtti badjel 40 jagi dasto addin mearrádusaide. Davvi-Suoma guovlohálddahusdoaimmahat attii 29.7.2024 mearrádusaid Lappi EJB-guovddáža ohcamušaide. Guovlohálddahusdoaimmahat hilggui oasi guolledoallovirgeoapmahaččaid gáibádusain.

Davvi-Suoma guovlohálddahusvirgeoapmahačča addin (nr 97/2024) mearrádus gusto Giemajoga Isohaara, Taivalkoski, Ossauskoski, Petäjäskoski, Valajaskoski, Vanttauskoski, Pirttikoski ja Seitakorva sihke Raudanjoki Permantokoski fápmorusttegiid guolledoallogeatnegasvuođaide. Guovlohálddahusdoaimmahat árvvoštallá mearrádusastis ahte dilit leat nuppástuvvan Giemajogas mihtilmasat čáhcelágas mearriduvvon vugiin. Mearrádusa mielde fápmorusttegiid oamasteaddjit galget čielggadit ja plánet Giemajoga Taivalkoski, Ossauskoski, Petäjäskoski ja Valajaskoski fápmorusttegiid sihke dárbbu mielde Isohaara fápmorusttega oktavuhtii ráhkadusaid, mat dahket vejolažžan luosa ja guvžžá beassama fápmorusttegiid buođuid meattá Giemajoga čázádaga veajetbuvttadanguovlluide. Seamma láhkai fápmorusttegiid oamasteaddjit galget plánet ráhkadusaid, mat dahket vejolažžan smolttaid ja gođđan oktagasaid luoitima vulos merrii.

Čielggadeamit ja plánat galget doaimmahuvvot doaibmaválddálaš lohpevirgeoapmahažžii fápmorusttetguovdasaš ohcamušáššin. Dasa lassin guovlohálddahusdoaimmahaga addin geatnegasvuohta sisttisdoallá čuovžža, rávdnječáziin báikkálaš gođđi sáivačáhceguliid, luosa ja guvžžá guoski gilvingeatnegasvuođaid sihke náhkkejačča boađu badjel sirdingeatnegasvuođa. Fápmorusttegat galget maiddái ovdanbuktit plána luosa ja guvžžá kompensašuvdnadárbbu deavdi doaibmabijuin dan maŋŋá go guollejohtima vejolažžan dahkki ráhkadusat leat gárvásat sihke čuovvut doaibmabijuid boađusbeaktilvuođa.

Davvi-Suoma guovlohálddahusdoaimmahaga addin mearrádus (nr 98/2024) gusto Iijoki Raasakka, Maalismaa, Kierikki, Pahkakoski ja Haapakoski fápmorusttegiid guolledoallogeatnegasvuođaide. Guovlohálddahusdoaimmahat árvvoštallá mearrádusastis ahte dilit leat mihtilmasat nuppástuvvan Iijokis čáhcelágas mearriduvvon vugiin. Fápmorusttega oamasteaddji galgá čielggadit ja plánet Iijoki Kierikki, Pahkakoski ja Haapakoski fápmorusttegiid sihke dárbbu mielde Raasakka fápmorusttega oktavuhtii ráhkadusaid, mat dahket vejolažžan smolttaid ja gođđan oktagasaid luoitima vulos merrii. Čielggadeamit ja plánat galget doaimmahuvvot doaibmaválddálaš lohpevirgeoapmahažžii fápmorusttetguovdasaš ohcamušáššin.

Dasa lassin geatnegasvuohta sisttisdoallá čuovžža ja eará luossaguliid sihke luosa ja guvžžá guoski gilvingeatnegasvuođaid, náhkkejačča boađu badjel sirdingeatnegasvuođa, geatnegasvuođa ovdanbuktit plána luosa ja guvžžá kompensašuvdnadárbbu deavdi doaibmabijuin dan maŋŋá go guollejohtima vejolažžan dahkki ráhkadusat leat gárvásat sihke doaibmabijuid boađusbeaktilvuođa čuovvuma.

Lohpemearrádusat leat oaidnimis Čáhce- ja biraslobiid diehtobálvalusas. Mearrádusat gávdnojit go áššesadjái čállá ášši diáranummira PSAVI/3111/2017 (Iijoki) ja PSAVI/932/2017 (Giemajohka ja Raudanjoki).

Mearrádusaide sáhttá ohcat váidimiin nuppástusa 4.9.2024 rádjai.

Lassedieđut:                                               

Birasráđđeolmmoš Laura Lindström, Davvi-Suoma guovlohálddahusdoaimmahat, 0295 017 672, Laura.Lindstrom@avi.fi

Birasallagohcci Taija Haurinen, Davvi-Suoma guovlohálddahusdoaimmahat, 0295 017 691, Taija.Haurinen@avi.fi, (ii olámuttus 29.7.–11.8.)