Kela ovddida ja geahččala sámegielat olbmuid ođđa veajuiduhttinbálvalusa

Kela ovddida ja geahččala Veajuiduhttin sámegielat olbmuide -prošeavttas sámegielat áššehasaide dárkkuhuvvon ođđa veajuiduhttinbálvalusa. Prošeavtta mihttomearrin lea ráhkadit giela ja kultuvrra vuhtiiváldi veajuiduhttinbálvalusa, masa ohcaleapmi lea njuovžil. Seamma oktavuođas háliiduvvo ovddiduvvot doaibmi ovttasbargu Kela ja sámedoaibmiid gaskkas ja maiddái ráhkaduvvot čielga bargojuohku dearvvasvuođafuolahusain.

- Veajuiduhttinbálvalus, mii prošeavttas geahččaluvvo, lea dál easkka ovddidanmuttus nu, ahte dárkilut ulbmiljoavkkus ja sisdoalus lea dárkkuhus dieđihit prošeavtta ovdánettiin, prošeaktahoavda Laura Jokiranta muitala.

- Veajuiduhttinbálvalusas, mii dál geahččaluvvo, vuhtiiváldojuvvo Kela rolla veajuiduhttinbálvalusaid ordnejeaddjin. Veajuiduhttinbálvalus čuovvu veajuiduhttinbálvalusaid, mat leat Kela bálvalusfálaldagas, iige veajuiduhttinbálvalusain leat dárkkuhus buhttet ovdamearkan doaimmaid, mat leat dearvvasvuođafuolahusa dahje eará doaibmi vásttu vuolde, muhto dievasmahttit áššehasa bálvalanbálgá dárbbašlaš osiin, Jokiranta lasiha.

Geahččaleami áigge čoggojuvvojit vásáhusat ja dieđut earret eará árvvoštallandutkamušain. Dan vuođul veajuiduhttinbálvalus ovddiduvvo viidásabbot nu, ahte dan sáhttá prošeavtta nogadettiin doalvut Kela veajuiduhttima bálvalusfálaldaga oassin. Dan lassin Kela árvvoštallá, sáhtášiigo giela ja kultuvrra vuhtiiváldi veajuiduhttinbálvalusa ovddideamis ja geahččaleamis leat ávki maiddái Kela eará bálvalusaid plánemis.

Prošeakta joatkašuvvá ovttasbargun čanusjoavkkuiguin

Kela lea ovttasbarggus Sámedikkiin ja Lappi buresveadjinguovlluin kárten sámegielat olbmuid iešguđetlágan veajuiduhttindárbbuid. Seamma oktavuođas lea badjánan ovdan, ahte veajuiduhttimis livčče dehálaš vuhtiiváldit giela ja kultuvrralaš sierraiešvuođaid, dego sámegielagiid árbevirolaš ealáhusaid, lagaš luondogaskavuohta, áige- ja dearvvasvuođaipmárdusaid, vásáhusvuđot dieđu ja maiddái searvvušlašvuođa. Giela vuhtiiváldin fas guoská Suomas hállon golbma sámegiela elege anáraš-, nuortalaš- ja davvisámegiela. Prošeavttas galgá doallat maiddái mielas, ahte badjel 60 proseantta Suomas ássi sámiin ássá sámiid ruovttuguovllu olggobealde, man lassin mátkkit sáhttet leat guhkit maiddái sámiid ruovttuguovllus.

- Sámedikkiin, Lappi buresveadjinguovlluin ja eará čanusjoavkkuiguin bargon áššedovdiid ovttasbargu lea Veajuiduhttin sámegielat olbmuide -prošektii ja veajuiduhttinbálvalusa ovddideapmái ja ollašuhttimii erenomáš dehálaš, prošeaktahoavda Laura Jokiranta deattuha.

- Almmá áššedovdiid ovttasbarggu haga mii eat beasa albma láhkai ovddos prošeavttas, Jokiranta lasiha.

Sámegielat olmmoš sáhttá juo dál oažžut tulkoma Kela ordnen veajuiduhttimiidda

Kela ordne jahkásaččat sámegielagiidda dárkkuhuvvon muhtin joavkohápmásaš veajuiduhttinkurssaid. Veajuiduhttinkurssain veajuiduvvi olmmoš oažžu doarjaga buozalmasas dahje váttus áhpáiduvvamii. Kurssain oažžu maiddái dieđuid buozalmasas, veardásašdoarjaga ja maiddái doarjaga árgga doaimmaide. Dát kurssat lágiduvvojit suomagillii ja tulkojuvvojit dárbbu mielde sámegielaide.

- Ovdamearkan dál sámegielagiidda leat fállun skábmamánus 2024 álgi Tules-kursa, mii lea dárkkuhuvvon bargoahkásaččaide ja stuđeanttaide, ja miessemánus 2025 álgá Tules-kursa, mii lea dárkkuhuvvon ealáhatolbmuide, Laura Jokiranta muittuha.

Loga lasi veajuiduhttimis

• davvisámegillii
• anárašgillii
• nuortalašgillii.

Sámegielat olbmot sáhttet, jos háliidit, oažžut tulkoma maiddái eará veajuiduhttimiidda, maid Kela ordne. Kela neahttasiidduin muitaluvvo dárkilabbot sihke sámegielat olbmuid veajuiduhttinkurssain ja Kela fállan eará veajuiduhttinbálvalusain. Dan lassin Kela veajuiduhttima brošyra lea oažžun láhkai maiddái sámegielaide.

Loga lasi

• Veajuiduhttin sámegielat olbmuide -prošeakta (kela.fi)
• Dutkanblogga: Saamenkieliset asiakkaat kokevat hyötyvänsä Kelan kuntoutuksesta, mutta kulttuurisia ja kielellisiä tarpeita pitäisi huomioida paremmin (suomagillii, tietotarjotin.fi)
• Dutkanblogga sámegillii: Sámegielat áššehasat vásihit, ahte sidjiide lea ávki Kela veajuiduhttimis, muhto kultuvrralaš ja gielalaš dárbbuid galggašii vuhtiiváldit buorebut (kela.fi)
• Tuomisto Sonja, Miettinen Sari, Laatu Markku, Länsman Sunná. 2024. ”Toivottavasti sinne menee saamelaisia enemmän, etteivät kuole kaikki ne kurssit”. Selvitys saamenkielisille asiakkaille suunnattujen Kelan kuntoutuspalveluiden nykytilasta. Kela, Työpapereita 192. (suomagillii, helda.helsinki.fi)