Kela-aaʹššid vuäitak håiddad neeʹttest ååʹn še sääʹmǩiõʹlle

Kela neʹttäʹššeemkääzzkõõzz leʹbe MuuKela lij tän räjja vuäittam ââʹnned juʹna lääʹddǩiõʹlle leʹbe ruõccǩiõʹlle. Ååʹn Kela lij õlmstâttam kääzzkõõzzâst vuõssmõs versio še kooumin Lääʹddjânnmest mainstum sääʹmǩiõlin. Kääzzkõõzz nõmm tâʹvvsääʹmǩiõʹlle lij MuKela da aanar- da nuõrttsääʹmǩiõʹlle MuuKela.

Sääʹmǩiõllsaž äʹššeemkääzzkõʹsse vuäitt ǩeeʹrjtõõttâd staanâld addrõõzzâst www.kela.fi vaʹlljeeʹl seiddõõzz vuäʹljsbeäʹl pâʹjjkuuʹlmest Ǩeeʹrjtõõđ sizz -teäddõõǥǥ (Kirjaudu) da tõn mâŋŋa ävvneei teäddõõǥǥâst vaajtõsmääin MuuKela (OmaKela). Kääzzkõʹsse tobddõõđât juʹna neʹttbaŋkktiõttjin leʹbe mobiilstaanõõǥǥin.

Ǩeeʹrjtõõttâm mâŋŋa äʹššneǩ vuäitt vaʹlljed jiijjâs ââʹnnem sääʹmǩiõl MuuKela ǩiõllvaʹljstõõǥǥâst. Taarbšeen äʹššneǩ vuäitt mäʹcced äʹššeem poodd hieʹlǩeld še lääʹdd- leʹbe ruõccǩiõllsaž kuâsttmõʹšše.

Sääʹmǩiõllsaž äʹššeemkääzzkõs vuäʹppast ooccmõõžž da meâlddõõzzi tååimtummšest

Sääʹmǩiõllsaž äʹššeemkääzzkõs vuäʹppast äʹššneeʹǩǩ ooccmõõžži da meâlddõõzzi tååimtummšest Kela konttra. Äʹššneǩ vaʹlljad kääzzkõõzzâst vaʹlljeem ouddõõzz da õhttad tõõzz jiijjâz aparaattin tieuʹddmes pdf-ooccâmlomaakk. Ǥu ooccmõš lij ruõkkjõõvvâm kääzzkõʹsse, äʹššneǩ vuäitt lââʹzzted tõõzz taarbšem meâlddõõzzid.

Alggpooddâst sääʹmǩiõllsaž kääzzkõõzzâst vuäitt ooccâd puõccihåidd- da taalkâskoʹrvvõõzzid, säursmâttmõõžž da lääʹmestuärjjõõzzid. Še vueʹllâkksa huõlteeʹjj leʹbe Suomi.fi-väʹlddvuõđin nuuʹbb peäʹlest äʹššeei ooumaž vuäitt vuõltteed ooudâst peäggtum ooccmõõžžid da tõi meâlddõõzzid.

Mâʹŋŋlubust tän eeʹjj täävtõssân lij raajjâd sääʹmǩiõllsaž kääzzkõʹsse jiijjâsǩiõllsaž ouddseeid da tuʹmmstõõǥǥi da jeeʹres äʹššǩiiʹrji kuâsttmõš. Ååʹn veâl tuʹmmstõõǥǥid, ǩiiʹrjid da jeeʹres äʹššǩiiʹrjid vuäitak vueiʹnned tåʹlǩ vaajteeʹl ǩiõl lääʹddǩiõʹlle leʹbe ruõccǩiõʹlle.

– Tuäivvap sääʹmǩiõllsaž äʹššniiʹǩǩi ǩiččlõddâm äʹššeemkääzzkõõzzi âânnmõõžž, håʹt-i kääzzkõõzzâst liâ âânnmõõžžâst eman tõn vuõssmõs jiijjâsnallšemvuõđ. Õõʹnnʼji toobdâlm lie miʹjjid samai vääžnai, ǥu kääzzkõõzzid viiǥǥât ooudâs, särnn MuuKela ooudâsviikkmõõžž äʹšštobddi Elina Sipola.

Kela.fist vuäʹpstet sääʹmǩiõʹlle še äʹššeemkääzzkõõzz âânnmõõžžâst

Kela.fi-seiddõõzzâst čiõlǥeet ååʹn oouʹdab vaiddsubun še sääʹmǩiõʹlle MuuKela âânnmõõžžâst. Seiddõõzzâst čiõlǥtet še vaajtõsmäinnsaž ǩeeʹrjtõõttâmnaaʹlin da vääʹld ouddmõõžžâst.

Kela.fist čiõlǥtet še, mäʹhtt neeʹttest vuäitt håiddad aaʹššid nuuʹbb peäʹlest. MuuKelast vuäitt håiddad aaʹššid nuuʹbb oummu peäʹlest, jõs kääzzkõõzz õõʹnni ooumaž lij tiuddâkksaž da nuʹbb tiuddâkksaž ooumaž lij ouddam vääʹld suu håiddad Kela-aaʹššeez. Še huõlteeʹjj vuäitt håiddad MuuKelast koid-ne vueʹllâkksa päärnes aaʹššid.

Äʹššneǩ vuäǯǯ jiijjâs tuʹmmstõõǥǥâst sääʹmǩiõllsaž jåårǥlõõzz

Sääʹmǩiõllsaž äʹššneǩ vuäǯǯ ouddõstuʹmmstõõǥǥâs vuõššân lääʹddǩiõlle leʹbe ruõccǩiõʹlle tõn vuâđald, mii suu meerteâttriâžldõʹǩǩe miõrkkum äʹššeemǩiõlâs lij. Äʹššeemǩiõllân vuäitak vaʹlljeed tåʹlǩ lääʹddǩiõl leʹbe ruõccǩiõl.

Jõs äʹššneǩ lij ooccâm ouddõõzz sääʹmǩiõllsaž ooccmõõžžin leʹbe muđoi õlmmääm haalees vuäǯǯad tuʹmmstõõǥǥâs sääʹmǩiõllsiʹžžen, Kela vuõlttad suʹnne ǩeʹrjjen še tuʹmmstõõǥǥ sääʹmǩiõllsa jåårǥlõõzz.

Jieʹnnǩiõllân vuäitt meerteâttriâžldõõǥǥâst iʹlmmted še tâʹvv-, aanar- leʹbe nuõrttsääʹm. Še Kela vuäǯǯ teâđ äʹššniiʹǩǩi jieʹnnǩiõlâst meerteâttrniâžldõõǥǥâst.

Säʹmmlain lij sääʹm ǩiõll-lääʹjj mieʹldd vuõiggâdvuõtt håiddad Kela-aaʹššeez jiijjâs ǩiõlin. Ǩiõllʼlaž vuõiggâdvuõđi teâuddjummuš vueʹjjest oudldad še liâdǥlaž äʹššeemvueiʹtlvažvuõđi taʹrjjummšid.

Looǥǥ lââʹzz

• Äʹššeemkääzzkõs OmaKela
• Ǩeeʹrjtõõttmõš MuuKela sizz
• Nuuʹbb peäʹlest äʹššummuš MuuKelast
• Staani äʹššummuš OmaKelast
• Sääʹmǩiõllsa lomaakk