Kela lij õlmstâttam eeʹjj 2024 jeäʹnnvuõttpaʹǩǩõõzz – ouddsi pââimõskriteeʹren kvaliteʹtt da staanvuõtt

Kela lij õlmstâttam eeʹjj 2024 jeäʹnnvuõttpaʹǩǩõõzz. Tän eeʹjj jeäʹnnvuõttpaʹǩǩõs âânn seʹst 39 ouddaz.

Kela miõttâm jeäʹnnvuõttveäʹǩǩvuõđ täävtõssân lij tuärjjeed puärraz da päärna pueʹrrvââjjmõõžž. Jeäʹnnvuõttveäʹǩǩvuõđ vuäitt vaʹlljed juʹna jeäʹnnvuõttpaʹǩǩõssân leʹbe 170 eeuʹr piiđteʹmes teäʹǧǧsummân. Nuʹt kueʹhtt kuälmad vueʹzz vaʹlljad jeäʹnnvuõttpaʹǩǩõõzz.

– Jeäʹnnvuõttpaʹǩǩõõzz vaʹllje tääuʹjmõsân vuõss-šõddeei. Teäʹǧǧsuumm peäʹlstes sij, ǩeäin lie juʹn siõm päärna da ouddaz tõi päärnai jeäʹnnvuõttpaʹǩǩõõzzin leʹbe ǩeäk lie vuäǯǯam toobdâs oummuin ääiʹjbu iiʹjji jeäʹnnvuõttpaʹǩǩõõzz ouddsid, plaaneeʹjj Veera Petäjä Kelast čiõlǥat.

Jeäʹnnvuõttpaʹǩǩõõzz ouddsid vuäitt tobdstõõttâd Kela jeäʹnnvuõttpaʹǩǩõõzz čuäʹjtem seeidain (lääddas) da tõn vuâđald vaʹlljeed, väldd-a veäʹǩǩvuõđ paʹǩǩõssân avi teäʹǧǧen. Petäjä mošttʼtad, što jeäʹnnvuõttpaʹǩǩõõzzâst åårrai pihttsid vuäitt uʹvdded nobba siõmâžpiârrja, ǥu siõmâž šâdd tõin rääjj. Kela neʹttseeidain käunnʼje še viiŋk jeäʹnnvuõttpaʹǩǩõõzz ouddsi ââʹnnemääiʹj kuuʹǩǩummša.

Kvaliteʹtt lij jeäʹnnvuõttpaʹǩǩõõzzâst vueʹlǧǧemsââʹjj

Jeäʹnnvuõttpaʹǩǩõõzz ooudasvaalljstõk seill eeʹjjest nobba kuuʹǩǩeld seämmanallšmen, leša ouddmiârkkân aunnsi eeuʹn da ouddsi meäʹr vaajtâʹlle. Halltõsprograammâst peäggtum päll ǩiččlõõđât lââʹzzted jeäʹnnvuõttpaʹǩǩõʹsse ääiʹjmõsân eeʹjjest 2026.

Jeäʹnnvuõttpaʹǩǩõõzz ouddaz ǩeâšttjââʹttet piiri-iiʹjji. Kela teʹsttai ouddsid kvaliteeʹtt da staanvuõđ ainsmâʹttem diõtt.

– Miʹjjid lij vääžnai, što ouddaz liâ staaʹni da ǩeâllʼje âânnmõõžž. Ǩieʹssempääʹdd jie vuäǯǯ ruõttâd siõʹme, jie-ǥa kuʹǩes suõnnkuuʹsǩ vuäǯǯ leeʹd, ǥu tõk vueiʹtte ǩiõzzõõttâd siõʹme jueʹlǧǧsuõrmi leʹbe suõrmi pirr. Säuʹnj ja knoopka âʹlǧǧe ǩeâllʼjed âânnmõõžž, juristt Johanna Aholainen Kelast särnn.

Lââʹssen jeäʹnnvuõttpaʹǩǩõõzz ouddaz âʹlǧǧe loŋŋted õhttsaž pooddid. Aholainen sårnn, što paʹǩǩõõzzâst lij ǩeʹrjj mieʹldd, koon haaʹleet nââneem päärna da puärraz vuârrvaaiktõõzz.

Jeäʹnnvuõttpaʹǩǩõõzz čuuʹǩǩ kaartʼtõõzzâst šeikkmâʹstte jieʹllipiârri

Jeäʹnnvuõttpaʹǩǩõõzz kaartʼtõs lij Satumetsä nõmmsaž. Tõt kovvad toobdâs meäʹccjieʹllʼjid jiijjâs dommpirrõõzzâst Lääʹddjânnam luâđast. Kaartʼtõõzz lij plaanääm kaartʼteeʹjj da graaflaž plaaneeʹjj Heli Hyppönen. Kaartʼtõs vaʹlljeeš ǩiiččeeijiõnstummuž vuâđald. 

– Leäm rämmai, ǥu vuõiʹnnem jiijjan kaartʼtõõzz tän eeʹjj jeäʹnnvuõttpaʹǩǩõõzzâst. Kaartʼtõs vuäǯǯai inspiraatios jeeʹresnallšem jieʹllipiârrjin, kook šeikkmâʹstte Lääʹddjânnam luâđast jeeʹres eeʹjjpooddin. Tuäivam vââʹllji kartʼtõõzzi da tõi pakk toobdâlm puʹhttem räämm juõʹǩǩ piârrja, Hyppönen kovvââll. 

Satumetsä-kaartʼtõs heäʹrvvad še puõʹtti eeʹjj jeäʹnnvuõttpaʹǩǩõõzz.

Jeäʹnnvuõttpaʹǩǩõʹsse vuäitt vuäǯǯad še sääʹmǩiõllsaž vuõssǩeeʹrj

Kelast vuäitt haaʹleen raukkâd jeäʹnnvuõttpaʹǩǩõʹsse sääʹmǩiõllsaž Rämm kuäškknjâst! -vuõssǩeeʹrj pukin kooumin sääʹmǩiõlin. Lââʹssen neeʹttest vuäitt laaddâd pdf-versio jeäʹnnvuõttpaʹǩǩõõzz ânnʼjõž Kaz, kaz, kaazzâž -vuõssǩeeʹrjest.

Lââʹssteâđ media

Snimldõõǥǥ media âânnmõʹšše õlmstââʹttet mâ 16.4. čiâss 9.00 addrõõzzâst: Mediapankki | Kela (sttinfo.fi)