Ruoššaluosa bivddus galgá váldit vuhtii Atlántta luosa

Boahtte geasi galgá ráhkkanit ruoššaluosaid (gubbeluosaid) valjes goargŋumii Deanu čázádahkii. Ruoššaluosa goargŋuma sáhttit caggat Norgga beale bivdobiergasiin, merddiin. Lea vejolaš, ahte meardebivdu ii lihkostuva plánejuvvon vugiin daikke dan gártat ráddjet vai Atlántta luossa ja eará guliid goargŋun dorvvastuvvo. Loahpalaš ruoššaluosaid goargŋunmearit čilget easkka geasi mielde, ja seammás čielgá bivddu dárbu Deanu rádjajohkaoasis.

– Ii oktage dieđe ollugo ruoššaluossa lea máhccamin Davvi-Atlánttas Detnui. Norggas lea fidnu ruoššaluosaid eretbivdima várás, ja juos dat lihkostuvvá, de dat geahpeda measta ollásit Suoma beallái goargŋu ruoššaluosa, muitala eana- ja meahccedoalloministeriija ráđđádalli virgeolmmoš Tapio Hakaste.

Ruoššaluossa lea goargŋunguolli ja vierisšládja, mii laská garrasit ja dat sáhttá áitit álgoálgosaš ealánriikii gulli šlájaid. Šládja lea ožžon namas das, ahte gođđoáigge goadjima čielggis lea gubbi, muhto guollebivdiid gal buorre oahpahallat earuhit guollešlája muđuige.

Ruoššaluosa bivdui lea dán jagi guokte vejolašvuođa. Vuosttažettiin dan sáhttá bivdit eará lobálaš guollebivddu oktavuođas, go guollebivdi čuovvu Deanu čázádaga guolásteapmái guoski njuolggadusaid ja bivdis leat dárbbašlaš guolástanlobit. Nubbi vejolašvuohta dan bivdui lea cegget sierra bivdofitnu, man plána galgá almmuhit ovddalgihtii Lappi ELY-guovddážii. Bivdu ii oaččo dagahit siidosalašjámu Atlántta lussii ja bivdobiergasii báhčán Atlántta luosa galgá álot luoitit ruovttoluotta luovus Detnui.

Sávvat olbmuid bivdit ruoššaluosa eará bivddu oktavuođas

Ruoššaluosa sáhttá bivdit dakkár lobiin, mii lea guolástanmearrádusain oaivvilduvvon eará guollebivdui. Seammá guoská maid bivdobiergasiid ja bivdoáigodaga. Juos ruoššaluosa boahtá sállašin, dan galgá goddit bivdonjuolggadusa mearrádusaid mielde. Dihtoearri ii leat mearriduvvon ruoššaluosaid várás. Dábálaš, guolástannjuolggadusain oaivvilduvvon bivddus ii dárbbaš dahkat almmuhusa ELY-guovddážii.

Deanus sáhttá bivdit ovdamearkka dihte soavvila, čuovžža, guvžžá ja hávgga. Atlántta luosa bivdu lea ollásit gildojuvvon dán jagi, daningo luossanálli lea heajos dilis ja dan berre suodjalit. Sállašin báhcán luosaid galgá luoitit luovus, ja juos dat bohtet máŋggat, de bivddu ferte heaitit ja lonuhit eará bivdosadjái. Atlántta luosa váldima ráŋggáštus lea 3 480 euro.

Ruoššaluosa eretbivdima fitnuin galgá almmuhit ELY-guovddážii

Dábálaš bivddu lassin dán jagi ruoššaluosa viiddit bivdu lea vejolaš dan bivddu várás plánejuvvon bivdofitnuin. Bivdofitnu galgá ákkastallat, das galgá bivdit namalassii ruoššaluosa ja das galgá garvit buot vejolaš vugiiguin Atlántta luosa gártama siidosállašin.

Ruoššaluosa galgá bivdit rivttes áigge rivttes sajis, ja lea dehálaš geavahit bivdobiergasiid, main lea álki luoitit luovus vahágis boahtán siidosállaša. Ovdamearkka dihte golgadat coages sajis lea dán várás buorre vuohki. Bivdofitnu galgá ollašuhttit dalle, go ruoššaluossa ohcala gođđosajiide. Ovddit jagiid ruoššaluossa lea goargŋugoahtán Detnui mihcamáraid maŋŋá ja dat lea gávdnon Deanus čakčamánu álgogeaži rádjai.

Bivdofitnus galgá almmuhit Lappi ealáhus-, johtolat ja birasguovddážii maŋimuštá geassemánu 19. beaivvi rádjái. Almmuhus dahkkojuvvo ELY-guovddáža skoviin. Bivdofitnu almmuheami lassin fitnu ollašuhttis galgá leat guolástanvuoigatvuohta guvlui ja guolástanlohpi, mii vuoigadahttá gažaldatvuloš bivdovugiid geavaheapmái.

Bivdofitnus ovddasvástideaddji galgá maiddái fuolahit das, ahte goddojuvvon sálaš áššáigullevaččat juo váldojuvvo biebmun daikke duššaduvvo nu, ahte dat ii hehtte moge.

Norggas ja Suomas geahččaluvvojit ođđa vuogit ruoššaluosa beaktilis eretbivdimii

Norga lea ollašuhttimin viiddes fitnu ruoššaluosa eretbivdima várás Norggas. Norgga fitnu váikkuhusat ruoššaluosa goargŋumii eat bastte árvvoštallat vel dálá muttus.

Luondduváriidguovddáš lea gárggiidahttán Deatnoleagi guolásteaddjiiguin ruoššaluosa bivdovugiid, maiguin sáhtášii beaktilit bivdit ruoššaluosa ja seammás seastit joga lunddolaš guollešlájaid nu bures go vejolaš. Smávvalágan bivdu geahččaluvvo suoidnemánus goargŋunáigge ja čuozihuvvo borgemánus gođđosajiide. Okta báikkálaččaid bivdojoavku nuohttu Vuolle-Geavgŋá vulobealde, golbma bivdojoavkku golgadit Njuorggáma ja Badje-Geavgŋá gaskkas Deanu váldooalis. Dán geasi gárggiidahttinfitnus sáhttit gárggiidahttit vugiid ruoššaluosa viiddit eretbivdimii boahtte jagiid várás.

Norgalaš guollefávttaiguin lea ovttasbargu ja singuin fáktejuvvo ovttas Deanu alde. Earenoamážit čuvvojuvvo ruoššaluosa bivdui almmuhuvvon bivdofitnuid ollašuvvan ja maid luossabivdogildosa doahttaleami. Suoma beale fáktemis lea geavahusas maiddái drona, mainna bastit johtilit dárkkistit váttisge guovlluid.